1 April, 2025
583
HISTORIA DUNHA SEREA, de Noelia Álvarez Verea, relato gañador da IV EDICIÓN DO CONCURSO DE MICRORRELATOS LIBRERÍA EIXO
«Chegar a casa era entrar na burbulla da que non sairía se fose posible. Alí só se levantaba a voz para chamar polo can ou para cantar algunha canción das vellas cintas que se gardaban no baúl da avoa.
Papá curaba as feridas con algodón e os dramas con palabras de alento, mamá contaba contos novos cada noite. A irmá maior prestábase a canto xogo se me pasaba polo maxín.
Entre os tres, cada mañá, intentaban calmar os meus nervios e aseguraban que ese día sería mellor que o anterior, que as bromas sen gracia dos compañeiros da clase pasarían pronto e que as voces que escoitaba de camiño á escola e de volta a casa acabarían por aborrecerse e marcharían lonxe.
A súa dedicación estábaos apagando e eu non quería iso, así que enchín os petos co seu cariño e deixei que a marea levase, comigo, toda aquela carga.»
BASES DA CONVOCATORIA DA CUARTA EDICIÓN DO «CONCURSO DE MICRORRELATOS LIBRERÍA EIXO»
Con motivo da celebración do mes de libro 2025 e do noso XXVI aniversario, convocamos a IV edición do CONCURSO DE MICRORRELATOS LIBRERÍA EIXO, que se rexirá polas seguintes bases:
- Poderá participar calquera persoa maior de idade, sen límite xeográfico.
- Cada participante poderá mandar como máximo dous microrrelatos, debendo utilizar un pseudónimo diferente para cada microrrelato presentado.
- Pódense presentar traballos tanto en lingua castelá coma en lingua galega.
- “DRAMA”, será a palabra que necesariamente deberá figurar no texto.
- A extensión será dun máximo de 150 palabras, sen contar o título.
- Os microrrelatos deberán ser inéditos e orixinais, sin ter sido premiados anteriormente e sin ter sido presentados de forma simultánea a outros certames.
- As obras enviaranse por correo electrónico co asunto “IV Concurso Microrrelatos Librería Eixo” á dirección de correo electrónico cultura@libreriaeixo.com . No mail deberán adxuntarse dous documentos en formato PDF: un será o microrrelato, e outro no que aparezca o título da obra xunto cos datos persoais do autor ou autora (nome, apelidos, teléfono de contacto e mail)
- O plazo de admisión, que comeza o día 1 de abril, rematará ás 12 da noite (24,00 h) do día 23 de abril, día do libro.
- O resultado darase a coñecer ao longo do día 25 de abril.
- O PREMIO consistirá nun vale por 100 euros a gastar en LIBROS do noso establecemento e entregarase o sábado 27 de abril en EIXO, sobre as 12,00 da mañá, sendo imprescindible a asistencia do galardonado para recibir o premio.
- O xurado estará composto por Xabier Domínguez (escritor e editor en Antela Editorial ), Ana Isabel Rodríguez Vázquez, gañadora da edición anterior, e un representante da Librería Eixo, e otorgará o premio atendendo aos criterios de orixinalidade, creatividade, calidade literaria e adecuación á temática do concurso.
- O persoa gañadora manterá os dereitos de autoría do microrrelato, aínda que cede os dereitos para que a organización poida facer uso no marco da actividade divulgativa da librería, sempre sen fins comerciais. Os traballos non premiados non serán utilizados para fin algún
- A participación no concurso supón a total aceptación das presentes bases.